Nasapwan nga wala na sang kabuhi ang isa ka 13-anyos nga bata nga lalaki matapos ini malumos sa bahin sang damsite sa Barangay Topland, Koronadal City.
Ini ang ginkumpirmar ni Punong Barangay Terrence Ehimplar sa interview sang Bombo Radyo Koronadal.
Suno kay Ehimplar, pasado alas-10 sang aga sang nakuha ang patay nga lawas sang biktima.
Ini ila nahibal-an matapos ginsugid sang kaupod man sini nga mga kabataan nga samtang nagapaligo sila sa damsite, nagsalom ang bata kag wala na ini nagbutwa.
Bangud sang kakulba, naghipos ang mga kaupod sini kag wala gilayon nagsugid sa mga ginikanan ukon otoridad.
Suno pa kay Ehimplar, kon nasugid lang ini sang mas temprano, posible nga nabuligan kag nasalbar pa ang kabuhi sang biktima.
Gindugang niya nga nangin mabudlay ang retrieval operation bangud naipit ang lawas sang bata sa mga bato kag sa structure sang dam.
Sa subong, magahimo sang tikang ang barangay kag ang pumuluyo sang Topland agud ipaidalom sa restriksyon ang pagligo sa dam.
Nagpanawagan man si Ehimplar sa kabataan nga indi magpanuko ukon magduha-duha sa pagsugid sa mga nagakatabu nga insidente agud nga matapna dayon kag malikawan ang kapareho nga trahedya.
