KORONADAL CITY- Nagsaka na sa 12 ang napatay bangud sa HIV/AIDS sa probinsiya sang South Cotabato subong lamang nga tuig.
Ini ang ginkumpirmar ni John Codilla, provincial focal person sang HIV AIDS sa interbyu sang Bombo Radyo Koronadal.
Suno kay Codilla, duha sa mga ini ang napatay sang nagligad nga semana lamang kun diin isa diri ang babaye kag ang pinakabata naman sa mga napatay ang yara lamang sa 17 anyos.
Dugang pa ni Codilla nga kadam-an sa mga napatay ang bangud sa late diagnosis.
Kaangot sini, gin-awhag ni Codilla ang tanan nga hatagan sang early detection kag mas temprano nga administration sang ARV drugs para sa mga HIV positive.
Suno sa iya, dapat nga ang may risky sexual behavior, babaye man ukon lalaki,ang magpaidalom man sa HIV screening.
Kadungan sini, ginabantayan man subong sang HIV/AIDS Core Team (HACT) ang mga nagapakighilawas sa kasubong nga lalaki kag mga babaye nga posible mangin rason sang paglapta sang HIV labi na sa mga kababaihan.
