KORONADAL CITY – Nagsaka na sa masobra isa ka gatos ang nagsungka nga katapu sang rebelde nga NPA sa probinsiya sang Sultan Kudarat.
Ini ang ginpahayag ni Lt Col Harold M Cabunoc, Commanding Officer sang 33rd Infantry Battalion, Philippine Army.
Suno kay Cabunoc, 23 ka mga rebelde gikan sa Guerilla Front 73 ang panibag-o nga nagsungka kag nakigdayalogo sa militar bangud indi na nila luyag nga makig-giyera sa mga suldado sa Senator Ninoy Aquino.
Ini tuga sang deklarasyon nga all-out war sang Duterte Administration batuk sa NPA.
Dugang pa ni Cabunoc nga sa nasambit nga numero kaupod sa nagsungka ang mga nagatindog nga lider sang Kilusang Rebolusyonaryong Barangay.
Sa subong, naglab-ot na sa 113 ang kabug-usan nga mga rebelde nga nagsungka sa militar humalin sang bulan sang Mayo 2017.
Kalakip man sa mga ginsungka sang rebelde ang mga matag-as nga sahi sang armas luthang kasubong sang M14 Rifle, M1 Garand Rifles, mga short fire arm kag eksplosibo.
Ginpahayag man ni Cabunoc nga may mga ginbuyagyag ang mga nagsungka nga rebelde nga makabulig sa paglagas sa iban pa nga mga katapu sang NPA nga nagapatigayon sang extortion activities kag mga kalakasan sa Mindanao.
Nagalaum naman ang opisyal nga masundan pa ang pagsungka sang iban pa nga mga lumad nga gin-arecruit sang NPA.
