Nagalab-ot sa 11 ka indibidwal ang napatay kag anum pa ang iban ang napilasan matapos ang nagluntad nga avalanche sa Mount Mizhirgi nga nahamtang sa Kabardino-Balkaria region sa North Caucasus sa Russia.
Ang Mount Mizhirgi ginakabig nga pinakamataas nga bukid sa Russia.
Sa nagluntad nga insidente, may kabug-usan nga 33 ka climbers ang naapektuhan sang avalanche.
Samtang, 10 ka climbers ang maluwas nga nakapanaog halin sa bukid.
Apang wala pa mahibaluan ang kahimtangan sang anum pa ka climbers nga posible nga yara gihapon sa lugar nga natabunan ukon naapektuhan sang avalanche.
Bangud sini, gilayon nga nagpatigayon sang search and rescue operations ang mga otoridad agud pangitaon ang mga biktima kag masiguro ang kaluwasan sang mga climbers nga wala pa makapanaog.
Sobra sa 50 ka emergency workers ang nagtambayayong sa operasyon.
Padayon nila nga ginapangita ang mga wala pa makita kag ginahatagan sang bulig ang mga napilasan.
Apang nangin mabudlay ang search and rescue operation bangod sa mabudlay kag delikado nga terrain sang bukid.
Dugang pa diri, padayon gihapon ang pamahog sang isa pa ka avalanche, gani kinahanglan nga mangin mabinantayon ang mga rescue worker samtang ginapangita ang mga biktima.
Sa karon, padayon ang pagmonitor kag pagresponde sang mga otoridad sa sitwasyon sa Mount Mizhirgi samtang ginapangita ang mga climbers nga wala pa nahibaluan ang kahimtangan.
