KORONADAL CITY – Nagakasubo sa subong ang pamilya sang isa ka 11-anyos nga bata nga babaye makaligad nga malumos-patay ini sa bahin sang Sitio Ofong, Bo. 6,Banga, South Cotabato.
Ginkilala ni Myline Sandigo, Sitio leader sang Bo. 6, Banga, South Cotabato ang biktima kay Alyas Lea, 11-anyos, estudyante kag residente man sang nasambit nga lugar.
Sa interbyu sang Bombo Radyo Koronadal kay Sandigo, ulihi na sang nahibaluan sang iloy sang biktima nga nagpaligo ini kaupod sang iya mga abyan sa suba.
Base naman sa panaysayon sang mga abyan sang biktima, malipayon pa sila nga nagapaligo sa suba sang hinali nalamang suno pa nga gin-atake sang balati-an sini nga kuyap si Alyas Lea rason nga nalumos ini.
Gintinguhaan pa nila nga salbaron ang biktima apang daw may nagabutong suno pa sa tiil sini padalom sa tubig.
Rason nga naghingyo na sila sang bulig sa Sitio apang wala na naabtan pa nga buhi ang biktima bangud sa kaluyuon man sang distansya sang lugar.
Sa subong, nagpangabay na lamang ang Sitio Leader sa mga kabataan nga kun maglagaw ukon magpadulong sa iban nga lugar ukon maligo man maglisensya sa ila tagsa ka ginikanan.
