KORONADAL CITY – Yara na sa kustodiya subong sang mga otoridad ang napulo ka tawo nga nagpakuno-kuno nga mga tinawo sang Land Transportation Office ukon LTO matapos nga maaresto sa ginpatigayon nga entrapment operation sang Upi PNP.
Ini ang ginkumpirmar ni Police Chief Inspector Erwin Tabora, hepe sang Upi PNP sa interbyu sang Bombo Radyo Koronadal.
Ginkilala ni PCI Tabora ang mga naaresto na sina Datu Razib B. Tapanding, 25y/o. Datu Piang. Maguindanao; Arthur L. Lumogdang, 42, Carmen, North Cotabato; Candao A. Bantas, 26y/o Midsayap, North Cotabato; Charles Pacete, 36, Mlang North Cotabato; Peranio Pacete, 41, North Cotabato, Jefrrey Pacete,36, Magpet, North Cotabato; Ronald S. Bernal,44, Mlang, North Cotabato; Danilo P. Saliling,44, Pob. Carmen,North Cotabato; Angelito C. Noble,39,Mlang North Cotabato kag Jean D. Pacete,38 Mlang North Cotabato.
Suno kay Tabora, bag-o ang ginpatigayon nga entrapment nakabaton sila sang report nga may yara sang nagapatigayon sang check point, nagapangdakop kag nagapangotong sa nasambit nga lugar nga nagpakilala nga mga tinawo sila sang LTO.
Sang ginberipeka sang pulisya sa LTO ginpanginwala sang mga ini nga nagpadala sila sang mga tinawo agud nga makapatigayon sang operasyon didto.
Narekober gikan sa mga suspek ang mga uniporme, IDs, banner kag iban pa nga mga kagamitan sa pagpanunto.
Natalana naman nga pasakaan sang kaso ang mga suspek.
