KORONADAL CITY- Indi magarepresentar sa mainstream ukon kabug-usan nga organisasyon sang Moro National Liberation Front (MNLF) ang 10 ka myembro sang mga ini nga nagpanumpa agud mangin kabahin sang Bangsamoro Transition Authority para sa pagtukod sang bag-o nga Bangsamoro government.
Ini ang ginpahayag ni Atty. Emmanuel Fontanilla, ang spokesperson sang MNLF sa interbyu sang Bombo Radyo Koronadal.
Suno kay Fontanilla, ma-athag ang kamanduan halin kay MNLF Chairman Nur Misuari nga indi mahimo nga makigbahin sa proseso sang Bangsamoro Autonomous in Muslim Mindanao (BARMM) bangud separar ang agreement nila sa gobyerno.
Apang ang pagkalakip suno pa sang 10 ka mga MNLF members sa BTA ang ila nga kaugalingon nga desisyon kag wala sang blessing halin sa pamunuan sang MNLF.
Kaangot sini, gin-insister ni Fontanilla nga wala sila sang mangin partisipasyon sa transisyon sang BTA bwas nga adlaw.
Ini bangud sa umpisa palang suno pa, wala na sila ginlakip apisar nga may nagduso nga dapat e-synchronize ang BOL kag MNLF 1996 Agreement.
Sa pihak sini, ginpasiguro naman ni Fontanilla nga bukas sila sa pagpakigdyalogo sa MILF kag gobyerno.
