KORONADAL CITY – Kasamtangan nga ginabulong subong sa HIV treatment hub sa probinsiya sang South Cotabato ang isa ka tuig nga bata nga nangin positibo sa HIV-AIDS.
Ini ang ginkumpirmar ni HIV- AIDS Focal Person John Arlo Codilla sa eksklusibo nga interbyu sang Bombo Radyo Koronadal.
Suno kay Codilla, ang nasambit nga bata ang residente sang North Cotabato kun diin 8 ka bulan pa lamang ini nga natukiban nga positibo na sa nasambit nga balatian.
Ulihi na sang mahibaluan sang iya pamilya nga positibo sa HIV-AIDS ang bata.
Nahibaluan nga bangud sa wala nagaayo nga ubo sang lapsag gilayon ini nga ginpaidalom sa screening kag nadiskubrihan nga positibo ini sa HIV nga nakuha niya sa iya iloy nga ginbawian sang kabuhi.
Nahibaluan nga ang iloy sang lapsag ang nakaangkon sang kumplikasyon sa sakit nga pneumonia kag Tuberculosis (TB).
Sa subong ginatinguhaan na sang Provincial Health Office ang paghatag sang treatment sa bata.
Kadungan sini, nagpanawagan naman si Codilla sa tanan nga mga kababaihan nga nagadala nga magpaidalom sa Test Screenings kag makaangkon sang regular nga prenatal check up.
