KORONADAL CITY – Yara na sa kustodiya sang mga otoridad ang isa ka driver sang Strada pick-up nga aksidente nakabunggo-patay sa isa ka tuig nga bata nga babaye sa Waling-waling St., atubangan lamang sang Rizal Park sakop sang Brgy. Zone 4, Koronadal City.
Ini ang ginpahayag ni PMSG Gandy Basan, investigator sang City Traffic sa interview sang Bombo Radyo Koronadal.
Suno kay Basan, nagluntad ang aksidente pasado alas-9 kahapon sang aga kun diin wala nabatyagan sang iloy sang biktima nga nagabakal sang bulak nga naghalin ini sa iya tupad kag nagpadulong sa dalan.
Nagdalagan suno pa ang bata nga babaye apang nadasma ini kag tiyempo nga nag-agi ang isa ka Strada pick-up rason nga nabungguan ini kag aksidente pa nga nalapakan sang ulihi nga royda.
Nadala pa sa South Cotabato Provincial Hospital ang bata apang gindeklarar na nga dead on arrival sang doktor.
Ginkilala naman ni Basan ang driver sang salakyan nga nakabunggo sa biktima nga si Melvin Apenton, 51 years old nga residente sang Barangay San Jose, Koronadal City kag isa ka manunudlo.
Suno sa panaysayon sang driver, naghalin ini sa simbahan kag naghapit sa balaligyaan sang bulak agud magbakal man apang wala nagdahom nga magluntad ang aksidente.
Makita man sa kuha nga video nga indi mapahamtang kag halos indi makapati ang driver nga may nabungguan ini nga bata.
Sa subong ginahulat na lamang ang pamilya sang bata sa kung ano ang mangin tikang sa natabo.
Sa tion nga magpursige ang pamilya, dako ang posibilidad nga magapangatubang sang kaso nga reckless imprudence resulting to homicide ang suspek.
