KORONADAL CITY – Yara subong sa kustodiya sang kapulisan ang driver sang Yellow Bus Line nga nag-araro sa isa ka motorisklo sa bahin sang Brgy. Maibo, Tantangan, South Cotabato.
Una sini, sa interbyu sang Bombo Radyo Koronadal kay Brgy Maibo Kapitan Jose Cabayao, nangyari ang aksidente sa bahin sang Prk. Bagong Sikat sa nasambit nga lugar pasado alas 7 kagab-i kun sa diin hubog suno pa ang duha ka sakay sang motorsiklo nga sanday Ponciano Bagayan Jr, 38 anyos, kag residente sang Brgy. Bukay Pait sa nasambit nga banwa kag si alyas “Freddie” nga amo ang tag-iya sang motorisklo.
Base sa inisyal nga imbestigasyon, hinali nga nag-overtake sa nasambit nga bus si Freddie kag nadalahig ang likod nga bahin sini.
Bangud sa natabo, nagtabog si Bagayan samtang gin-araro naman sa idalom sang bus si Freddie kaupod ang motorsiklo sini sa kalayuon nga 30 metros.
Nakaangkon sang mga pilas sa lawas ang mga biktima kun sa diin gindangat si Bagayan sa South Cotabato Hospital samtang sa isa ka pribado ka ospital naman gindala si Freddie.
Natalana naman nga isaylo sa siyudad sang Davao si Freddie bangud kritikal ang kahimtangan sini.
Samtang ginaandam na ang nagakaigo nga mga kaso batok sa driver sang bus bangud sa nasambit nga hitabo.
