KORONADAL CITY – Nagapadayon ang assessment sang nagkalain-lain nga ahensiya sang gobyerno angot sa nagluntad nga magnitude 6.6 nga linog nga sentro ang banwa sang Tulunan, North Cotabato.
Sa siyudad sang Koronadal, ginkumpirmar ni Mayor Eliordo Ogena ang isa nga ginbawian sang kabuhi samtang madamo naman ang gindala sa balay-bululngan matapos nga magkalalipong bangud sa mabaskog nga pagtay-og.
Ginkilala ang napatay nga si Nestor Narcisco, 66-anyos, residente sang Bagong Sikat, Brgy GPS, Koronadal City matapos nga matabunan sang natiphag nga debris gikan sa isa ka puluy-an.
Magluwas diri, madamo man ang ginpagdala sa hospital matapos nga mapilasan kag magkalalipong, may mga litik man nga napagkit sa mga pribado kag pampubliko nga establishemento sa siyudad kag mangin sa probinsya sang North Cotabato.
Masobra 100 naman ang mga ginpangdala sa nagkalain-lain nga hospital sa Koronadal kag North Cotabato.
Samtang, gilayon man nga nagdeklarar sang class kag work suspension sa tanan nga lebel sa Koronadal si Mayor Ogena agud hatagan ligwa ang assessment sang mga edifisyo kag talatapan.
Ginsuspender man ang klase sa mga banwa sang Surallah, Tantangan, Norala sa South Cotabato kag mangin sa Kidapawan City bangud sa linog.
Sa subong, nagpahanumdom man ang nagkalain-lain nga ahensya sang gobyerno sa publiko nga indi magpanic kag magpabilin nga kalmado bangud mas madamo pa nga aftershocks ang mabatyagan.
Nahibaluan nga kaina alas- 9:04 napagkit ang linog kun diin sentro ang Tulunan, North Cotabato nga may kadalumon nga 8km kag tectonic ang origin.
Ini na ang pinakamabaskog nga pagtay-og nga nag-igo sa Mindanao subong nga bulan sang Oktubre.
