KORONADAL CITY – Patay ang isa ka katapu sang rebelde nga New Peoples Army (NPA) sa panibag-o nga engkwentro batuk sa militar sa Barangay Kiadsam, Senator Ninoy Aquino, Sultan Kudarat.
Ini ang ginpahayag ni Lt. Col. Tristan Rey P. Vallescas, ang commanding officer sang 7th Infantry (Tapat) Battalion.
Suno sa opisyal, nagpatigayon sang operasyon ang militar batuk sa terorista nga komunista matapos ang report sang mga residente angot sa pagpangilkil ukon ‘extortion activities’ sang mga ini.
Bangud sini, nakaengkwentro sang militar ang yara sa walo ka mga komunista nga ginapamunuan ni Eusibio Cranzo nga mas kilala sa tawag nga Brix ukon Agaw.
Nagdugay sang apat ka minutos ang kambyuhanay sang lupok tubtob nga nag-atras ang mga ini sa bahin sang Sitio Kiluding sa nasambit nga lugar.
Matapos sini, isa ka bangkay sang rebelde ang narekober nga wala pa makilala tubtob subong.
Narekober naman sa lugar sa diin nagluntad ang engkwentro Caliber 30 Garand Rifle kag mga bala.
Sa karon, nagapadayon ang paglagas sang militar sa nakapalagyo nga mga NPA.
Samtang, nagpanawagan ang opisyal sa mga nabilin pa nga myembro sang Sub-Regional Committee Daguma sa Sultan Kudarat kag bug-os nga area of operations sang JTF-Central nga magsungka na sa mga otoridad agud malikawan ang panibag-o nga engkwentro.
