KORONADAL CITY – Ginbawian sang kabuhi ang isa ka driver matapos nga nabungguan sang L300 van ang ginamaneho nga motorsiklo sini sa Purok 2, Barangay Dumadalig, Tantangan, South Cotabato.
Ginkilala ang napatay nga si Ramel Heyres Cosio Jr, 27-anyos, single, driver sang Biotech kag residente sang Purok Pag-asa II, Barangay San Isidro, Sto Nino, South Cotabato.
Naguwa sa imbestigasyon sang mga otoridad nga ginamaneho ni Cosio ang motorsiklo sini halin sa Koronadal padulong sa siyudad sang Tacurong sang nasugata sini ang isa ka L300 van nga ginapanag-iyahan sang Atlas Builder Supply Corporation nga nagabiyahe sa opposite nga direksyon gikan naman sa siyudad sang Tacurong padulong sa Koronadal.
Apang, pag-abot sa Barangay Dumadalig, gin-okupa sang motorsiklo nga ginamaneho ni Cosio ang pihak nga lane nga ginaagyan sang L300 van rason nga nabungguan ini.
Naghana pa nga maglikaw ang L300 apang tigayon nga nabungguan ang motorsiklo nga gintunaan sang pagtabog sang driver sini.
Natukiban nga yara sa impluwensiya sang makahulubog nga ilimnon si Cosio rason nga gin-okupa sini ang “wrong lane” nga amo ang gintunaan sang pagkabunggo sa iya sang L300 nga salakyan nga ginamaneho ni Joseph Bayabay Gido nga residente sang Purok 30, Ocean View, Barangay Ilang, Davao City.
Gilayon nga gindala sa hospital ang driver sang motorsiklo apang gindeklarar na ini nga dead on arrival.
Samtang, nakaangkon naman sang minor injury ang driver sang L300 van kag yara na karon sa kustodiya sang kapulisan.
