1 patay sa engkwentro sa tunga sang CAFGU kag NPA

KORONADAL CITY- Nagapadayon ang manhunt operation sang mga militar sa rebelde nga NPA nga ginapatihan nga nagapanago sa hilit nga bahin sang banwa sang Magpet, North Cotabato.

Ini matapos ang nagluntad nga engkwentro sa tunga sang CAFGU kag rebelde nga grupo sa Sitio Buay-Buay, Barangay Basak sang nasambit nga banwa.

Ang nasambit nga engkwentro ang nagresulta sa kamatayon sang isa ka CAFGU member nga ginkilala kay Elisio Sicao.

Ginpahayag ni 2nd Lt. Silver Belvis nga nagapatigayon sang Combat Patrol ang tropa sang mga Cafgu sang 39th IB sang Philippine Army sang maka enkwentro ang yara sa 15 NPA nga rebels sang Guerilla Front 53.

Naglab-ot sa isa ka oras ang engkwentro sang duha ka grupo kun sa diin una nga nag-atras ang rebelde nga NPA.