KORONADAL CITY – Patay ang isa ka suldado sa natabo nga engkwentro sa tunga sang mga pulis kag suldado batuk sa suno pa mga katapu sang Moro Islamic Liberation Front (MILF) lost command pasado alas 2 kaina sang hapon sa probinsiya sang Sultan Kudarat.
Ginkilala ang napatay nga si Sgt. Davidis Endario nga naigo sang bala makaligad nga magkambyuhanay sang lupok ang duha ka bahin.
Sa ginpalab-ot nga impormasyon ni Bombo Correspondent Larry Geronio, nagpatigayon sang joint operation ang kapulisan kag militar sa Barangay Bual, Isulan Sultan Kudarat agud nga i-sirbe ang search warrant batuk kay Kumander Dimas alyas Dragon nga suno pa anay katapu sang Moro Islamic Liberation Front (MILF) apang nagseparar sa grupo kag nangin lost command.
Nagbato suno pa ang mga tinawo ni Kumander Dimas nga nagresulta sa pila ka minutos nga engkwentro.
Apang, gilayon naman nga nagpalagyo ang grupo ni Kumander Dimas makaligad nga nadugangan ang pwersa sang mga suldado.
Sa subong, nagapadayon pa ang paglagas sang otoridad sa mga nagpalagyo nga myembro sa MILF lost command.
