KORONADAL CITY – Patay ang isa ka myembro sang Bangsamoro Islamic Freedom Fighters (BIFF) samtang lima naman ang pilason sa ginlunsar nga military operation sa probinsiya sang Maguindanao.
Ini ang ginpahayag ni Col. Oriel Pangcog, commander sang 601st Brigade, Philippine Army sa interview sang Bombo Radyo Koronadal.
Suno kay Col. Pangcog, ang air kag artillery attack ang ginlunsar sa Datu Salibo, Maguindanao matapos sila makabaton sang report gikan sa mga residente nga nagaplano ang mga myembro sang BIFF nga magpatigayon sang panibag-o nga pagpamomba sa Central Mindanao.
Bilang resulta sang airstrike sa kuta sang mga terorista sa 4 ka barangay sa Datu Salibo, napatay ang myembro sang BIFF nga ginkilala kay Sadam Salandang.
Gilayon naman nga na-turn over sang mga suldado ang bangkay ni Salandang sa pamilya sini.
Samtang, pilason naman ang mga kaupdanan sini nga sanday Samsudin, Muntas, Sanged, Bedoh kag Salik.
Ang nasambit nga mga terorista nga nagapanago sa Datu Salibo ang mga tinawo suno pa nanday Kagui Karialan kag Abu Toraife.
Narekober sa ginpatigayon nga clearing operation ang duha ka M16 rifle, isa ka M203 rifle, isa ka .30 caliber Garand, duha ka .30 caliber Carbine, isa ka .50 caliber nga Barret rifle kag mga improvised explosive device.
Sa pihak sini, ginpasiguro ni Col. Pangcog nga yara sila nga nagamonitor kag magabantay sa seguridad sang mga residente sa lugar.
