KORONADAL CITY– Apat ang pilason samtang dead on the spot naman ang isa ka babaye makaligad nga maigo sang nagtabog nga bato tuga sang nagahagunos nga elf truck nga nadulaan sang kontrol samtang nagapanaug sa nabukid nga bahin sakop sang boundary sang Sitio Cadidadng, Barangay San Jose, Koronadal City kag Colombio, Sultan Kudarat.
Nakilala ang napatay nga biktima nga si Tita Arandia, 57-anyos, residente sang Prk Bantalan, Brgy Cadidang, Koronadal City samtang pilason naman ang 4 ka sakay sang elf truck nga ginkilala kanday Warlito Gallos, 48 anyos; Arnol Danton, 56-anyos; Aida Danton, 46-anyos nga lunsay residente sang Brgy Libertad, Colombio Sultan Kudarat.
Pilason man ang driver sang truck nga si Kent Nadera, 25-anyos kag residente sang Prk Santan, Avanceña, Koronadal City.
Naguwa sa imbestigasyon sang PNP nga nadulaan sang brake ang salakyan rason nga nadulaan man sang kontrol ang driver samtang nagapanaug ini.
Sa nangin panaysayon naman sang nakakita sa aksidente nga si Dexter Orence, wala na makalikaw pa ang biktima nga napatay rason nga naigo ini sang dako nga bato kag nakaangkon sang madamo nga pilas sa lawas.
Sa kamatuoran suno pa, nagsinggit pa si Tita nga magpalayo ang mga harvesters sang mais nga yara man sa lugar bangud sa tuman ka dasig sang truck apang wala man suno pa ini nakahalin sa kilid sang dalan rason nga ini ang napatay.
Sa karon, padayon pa nga gina-obserbaran ang kahimtangan sang mga pilason nga biktima sa balay bululngan samtang nagapadayon man ang imbestigasyon sang PNP sa nasambit nga insidente.
