Isa ang kumpirmado nga patay kag ginabanta nga 38 ang missing sa landslide nga nagluntad sa landfill site sa Barangay Binaliw, Cebu City kahapon sang hapon, Enero 8.
Suno kay Cebu City Mayor Nestor Archival, ginabanta nga 94 ka mga trabahador ang yara sa area sang natiphag ang duta.
As of 7 am subong nga adlaw, 12 workers na ang na-rescue. Ginpasiguro naman sang local government unit ang 24 oras nga retrieval operation.
Yara naman sa lugar ang medical assistance kag emergency support teams bilang suporta sa search kag rescue operations.
Sa separado nga statement, ginkumpirma naman sang Prime Waste Solutions Cebu nga natabo ang landslide sa ila nga waste management facility sa Barangay Binaliw sang alas kuwatro sang hapon.
Suno sa operator sang pasilidad, naga-trabaho ini kaupod sa mga ahensya sang gobyerno kag sa lokal nga pamunuan agud nga maghatag sang kinahanglanon nga assistance kag agud nga maka-suporta sa mga apektado sang insidente.
Dugang pa sang Prime Waste Solutions Cebu, suspendido anay ang operasyon sang pasilidad.
Ginapangabay man sa publiko nga likawan anay ang pagpalapit sa area.
Una naman nga ginpahayag sang iban nga mga opisyal sang syudad nga bangud sa sunod-sunod nga mga pag-ulan, naghumok ang duta sa landfill rason nga wala nalikawan ang pag-collapse sini. #
