KORONADAL CITY – Isa ang ginbawian sang kabuhi samtang 3 naman ang pilason sa pagkarambola sang 3 ka salkayan sa Crossing Palkan, Polomolok, South Cotabato pasado alas-2 kahapon sang hapon.
Sa interbyu sang Bombo Radyo Koronadal kay Police Corporal Alexander Cruz sang PNP-traffic sang banwa sang Polomolok, naguwa sa ila imbestigasyon nga nag-overtake ang Nissan Navarra pick up sa jeep nga sakay ang mga empleyado sang DOLE Philippines padulong sa banwa sang Tupi apang bangud sa madanlog ang dalan tuga sang pagbubo sang ulan kag insakto nga nakasugta sini ang isa ka closed wing van nga padulong sa General Santos City rason nga nabungguanay ang mga ini.
Sa kabaskugon snag impact nadalahig pa sang isa ka wing van ang kilid sang jeep apang nakalikaw ang driver rason nga slight damage lamang ang naangkon sang jeep.
Totally wreck naman ang atubangan nga bahin sang pick up kun diin dead on arrival na sa hospital ang isa sa mga pasahero sini nga ginkilala kay Dagaman Salanda, yara sa legal nga edad kag residente sang Brgy. Lotilla,Isulan, Sultan Kudarat.
Pilason naman ang driver sang pick up nga ginkilala kay Salidhitan Nurudin kag duha pa ka mga pasahero nga kaupod sini.
Luwas naman ang driver kag pahinante sang wing van subong man ang driver kag 12 ka pasahero sang jeep.
Sa subong padayon pa nga ginahibalo ang medical bulletin sang 3 pa ka mga pilason kalakip na ang driver sang pick up.
