KORONAAL CITY – Nagresulta sa kamatayon sang isa ka smuggler kag pagkapilas naman sang 3 ka iban pa ang entrapment operation nga ginlunsar sang mga otoridad sa Barangay Upper Baguer, Pigcawayan North Cotabato.
Ini ang ginkumpirmar ni Police Major Jayson Baynosa, hepe sang Pigcawayan PNP sa interview sang Bombo Radyo.
Ginkilala ang napatay nga si Vhan Mangcog Ali, 40 anyos samtang pilason naman ang kaupod sini nga si Tahir Musa, 53 anyos, lunsay mga residente sang Pagalungan, Maguindanao matapos magbato sa mga otoridad.
Samtang, pilason man ang duha pa ka indibidwal nga nalamita lamang nga sakay sang Town Ace Jeep nga ginbungguan sang salakyan sang mga suspek nga natiyempuhan lamang nga yara sa kilid sang dalan sang sina nga tion.
Suno kay Baynosa, ang entrapment operation ang ginpatigayon batuk sa grupo ni Ali nga involbado sa pagbaligya sang smuggled cigarettes.
Ginhana suno pa nga pauntaton sang mga otoridad ang salakyan sang mga suspek apang sa baylo nga mag-untat nagpalagas ang mga ini kadungan sang pagpalupok sa kapulisan nga nagresulta sa shootout.
Sa pagbayluhanay sang lupok naigo si Ali nga gintunaan sang pagkamatay sini samtang pilason kag gindala sa hospital ang kaupod sini.
Narekober sa salakyan sang mga suspek ang siyam (9) ka box sang Fort cigarettes nga nagakantidad sang P135,000 pesos, duha ka pakete sang ginapatihan nga shabu, caliber 45 nga loaded sang magazine nga may anum (6) ka bala; 1 ka fire cartridge case sang .45 Caliber Pistol kag P11, 000 nga cash.
Dugang pa ni Baynosa, madugay na nga ginasurveillance sang kapulisan ang mga suspek bangud sa pagkainvolbar sa illegal nga aktibidad.
Magapangatubang naman sang nagakaigo nga kaso ang mga ini.
