KORONADAL CITY – Nagapangasubo ang pamilya Timbang sa hinali nga pagkapatay sang ila bata kasunod sang una nga adlaw sang klase sa bahin sang Lake Sebu, South Cotabato.
Kasunod ini sang tuman nga pilas sa ulo nga naangkon sang biktima nga ginkilala nga si Albert Timbang, 13-anyos bangud sa pagkatumba sang puno sa covered walk nga ginasilongan sang biktima.
Sa interbyu sang Bombo Radyo Koronadal kay Police Chief Master Sergeant Alojado sang Lake Sebu PNP, magluwas sa napatay nga estudyante pilason man ang iban pa nga estudyante nga ginkilala sanday Rose Sampalan; Jewish Aban Tuson kag Cristy Faith Sangkala; lunsay mga estudyante sang Lake Sebu National High School.
Ginpasiguro naman ni Alojado nga yara na sa luwas nga kahimtangan ang nasambit nga mga estudyante.
Madumdoman nga nagsilong ang nasambit nga mga biktima bangud sa malain nga paniempo nga nabatyagan didto.
Samtang nagpahanumdom naman si Lake Sebu MDRRMO Officer Roberto Bagong sa mga ginikanan kag mga estudyante nga dapat maghalong ilabi na nga amat-amat na nga mabatyagan ang mga pag-ulan subong nga tion.
