KORONADAL CITY – Ginbawian sang kabuhi ang isa ka persona samtang pilason naman ang duha pa ka mga kaupdanan sini matapos nga makuryente samtang ginakay-o ang tangke sang tubig sa Pigcawayan, North Cotabato.
Ini ang ginkumpirmar ni PCpl Josyl Palencia sang Pigcawayan MPS sa interbyu sang Bombo Radyo Koronadal.
Ginkilala ang napatay nga si Jesus Tagaan, 45, nga residente sang Barangay Balogo, Pigcawayan, North Cotabato samtang ang mga yara sa kritikal nga kondisyon amo sanday Meynard Calimos, 30, kag ang iya utod nga si Rene, 51.
Suno kay Pcpl Palencia, ang mga biktima ang may ginakay-o nga linya sang tubig pasaka sa isa ka tangke nga halos tupong na sa kable sang kuryente sa kilid sang Cotabato-Davao Highway sang isa sa ila ang hinali nga nakatandog sa linya nga gintunaan sang ila pagka-kuryente.
Gilayon naman nga nagresponder ang isa ka katapu sang kapulisan nga ginkilala kay Police Sergeant Atilano Arandilla III, nga nag-angkon man sang mga pilas sa lawas sang ini ang nahulog gikan sa mataas nga lugar samtang ginapatigayon ang pagrescue sa mga biktima sang pagkakuryente.
Nahibaluan nga halos sunog ang lawas sang napatay on the spot nga si Tagaan samtang nalapnos naman ang nagkalain-lain nga bahin sang lawas sang mag-utod nga Calimos.
