KORONADAL CITY – Patay ang escort ni South Upi Mayor Reynalbert O. Insular, samtang duha ang pilason sa mga kaupdanan sini makaligad gin-ambush takna alas 2:10 kaina sang hapon ang convoy sang alkalde sa bahin sang Barangay Pandan.
Sandig sa report, padulong sa Barangay Poblacion Romongaob, South Upi, Maguindanao ang alkalde kaupod ang iya nga convoy nga ginalakipan sang PNP kag militar sang pag-abot sa nasambit nga lugar nga may kalayuon nga 400 metros ang kalayuon sa CAA detachment sang hinali na lang sila nga ginpaulanan sang aud-asod nga lupok sang armas luthang.
Nahimo pa nga magbalos sang lupok ang mga escort ni Mayor Insular apang isa sa mga ini ang ginbawian sang kabuhi samtang duha naman ang pilason nga sa gilayon gindangat sa pinakamalapit nga balay bululngan.
Sa subong, padayon pa nga ginahibalo ang mga pangalan sang escort ni Mayor nga napatay kag ang mga pilason.
Yara na sa luwas nga kondisyon ang alkalde makaligad ang pagpang-ambush.
Nagapadayon naman ang imbestigasyon sang mga otoridad sa nagluntad nga insidente samtang ginahibalo pa kon ano ang motibo sang krimen.
