KORONADAL CITY – Nagapadayon ang imbestigasyon sang mga otoridad sa pagpamusil sa bahin sang habal-habal terminal sa Crossing Polonuling, Purok 15A, Barangay Polonuling, Tupi, South Cotabato nga nagresulta sa pagkapatay sang isa kag pagkapilas naman sang isa pa.
Ginkilala ang napatay nga si Percy Lagne Jr., 43-anyos, isa ka habal habal driver, kag residente sang Purok 4, Barangay Polonuling Tupi South Cotabato.
Suno sa Tupi PNP, nagahulat sang pasahero ang biktima matapos nga tiruhon sang riding in tandem nga mga suspek rason sang iya kamatayon.
Apang bag-o nagpalagyo ang mga suspek gintiro pa gid nila ang isa ka driver nga ginkilala kay Noel Alconera, 62-anyos, may asawa, kag residente sang Perez, Subdivision, Purok Malakas, Barangay San Isidro, General Santos City nga nag- agi lang sa lugar.
Gindala naman sa ospital ang mga biktima apang ang biktima nga si Lagne ang ginbawian sang kabuhi.
Sa ginpatigayon nga hot pursuit operation sang kapulisan, nakit-an ang mga suspek sa Purok 5, Barangay Sumbakil, Polomolok nga nagbato sa kapulisan nga nagresulta sang kamatayon sang isa ka suspek nga ginkilala kay Montaser Bansil Catucan, alyas “Tong Catucan”, 23-anyos, miyembro sang DI-SOCKSARGEN KHATIBA kag residente sang Barangay Sumbakil ,samtang nakapalagyo naman ang iya upod.
