KORONADAL CITY-1 patay , 1 sang kritikal sa baga-anay sang isa tricyle kag isa ka closed van nga nagluntad sa bahin sang National Highway, Purok Maligaya, Bukaypait, Tantangan, South Cotabato kagina sang aga.
Ginkilala ni PCapt. Renjune Bagaman, Hepe sang Tantangan MPS ang mga sakay sang tricyle nga sanday Elegio Feguracion Jr., 18 anyos kag ang driver sang motor nga si Norli Estabillo, 25 anyos kag lunsay mga residente sang banwa sang Tantangan, South Cotabato.
Sandig sa imbestigasyon sang mga otoridad, ginasubay sang 2 salakya ang kalabaon sang national highway sa diin padulong ang tricyle sa direksyon pa sentro sang Koronadal samtang ginasubay naman sang closed van ang dalan padulong sa bahin sang syudad sang Tacurong.
Pag-abot sa nasambit nga lugar nga gin luntaran sang aksidente, hinali nalang nag “U turn” ang tricyle pabalik sa direksyon nga gina subay sang van sa diin nadalasa ang mga ini sang van nga may plate #AEA 9568 nga may mga tinapay.
Sa kasusog sang impact sang collision sang 2 ka salakyan, gupi ang sidecar sang tricycle kag nagtabog ang mga sakay sini samtang gupi naman ang atubangan nga bahin sang closed van.
Madasig naman nga gin hingagaw sa South Cotabato Provincial Hospital (SCPH) sanday Feguracion kag Estabillo apang gindeklarar nga Dead-on-arrival ang biktima nga si Feguracion samtang kritikal naman ang biktima nga si Estabillo. Sa subong naga padayon pa ang madalom nga imbestigasyon sang mga otoridad sa nasambit ng mga aksidente.
