KORONADAL CITY – Nagapaayo na sa South Cotabato Provincial Hospital ang isa ka pamilya makaligad nga mangin biktima sang food poisoning bangud sa ginbakal nga pagkaon sa school canteen sa banwa sang Banga, South Cotabato.
Ginkilala ang mga biktima nga sanday Junrel Ebad, 31 anyos; Marque Ebad, 29 anyos kag ang ila bata nga 5 anyos nga lunsay mga residente sang Barangay Malaya, Banga, South Cotabato.
Suno kay Junrel, nagbakal sila sang buchi sa canteen sang Malaya Elementary School kag ginkaon sa ila nga puluy-an.
Pagkaligad sang masobra isa ka oras, nakaeksperiensiya na ang mga ini sang pagpalanakit sang tiyan kag pagpalanuka.
Bangud nga indi na maagwanta ang sakit gindala na ang mga ini sa hospital kag didto napamatud-an nga nahilo sila sang ginkaon nga buchi.
Aminado naman ang pamilya Ebad nga wala na sila sang iban pa nga may ginkaon kundi ang ginbakal nga pagkaon sa school canteen.
Kaangot sini, magapatigayon naman sang imbestigasyon ang buluthuan kun matuod nga ang ginbakal nga buchi sang pamilya Ebad ang nakahilo sa ila.
