KORONADAL CITY- Nawasak ang yara sa 20 ka mga puluy-an sa Sitio Little Baguio, Brgy. El Nonok sa banwa sang Banga South Cotabato makaligad magpanalasa ang landslide bangud sa pila ka adlaw nga pagbubo sang ulan sa probinsya samtang ginatos naman ka indibidwal ang nagbakwit.
Sa interbyu sang Bombo Radyo Koronadal kay Brgy. El Nonok kagawad Ernesto Artus ang mga puluy-an nga nawasak ang ginhimo sa light materials rason nga madasig ini nga naguba kag natabunan sang lutak halin sa nabukid nga bahin nga nagkibot naman sa mga pumuluyo.
Kaangot sini, isa ka residente naman ang natabunan sang duta nga ginkilala kay Bernie Balolo, 21 anyos nga ginburuligan nga i-rescue sang mga katupad balay sini apang yara sa kritikal nga kondisyon.
Sa subong, ginahibalo pa sang South Cotabato Provincial Disaster and Risk Reduction Management Office ang kabug-usan nga damyos sang napagkit nga landslide.
Nahibaluan nga luwas sa banwa sang Banga, naka eksperyensya man sang pagbaha ang pila ka bahin sang syudad sang Koronadal bangud man sa malain nga paniempo.
