KORONADAL CITY – Nagresulta sa engkwentro ang gin-implementar nga pagsalakay sang mga operatiba sa isa ka ginapatihan nga drug den sa Purok Punta Barrio, Barangay Mabini, Koronadal City nga nagresulta sa pagkamatay sang isa ka suspek kag pagkaaresto naman sang isa pa.
Ini ang ginkumpirmar ni Barangay Kagawad Elmo Maguad sang Brgy. Mabini, Koronadal City sa interview sang Bombo Radyo Koronadal.
Ginkilala ang napatay nga si alyas “Joemar”, yara sa legal nga edad kag residente sang Purok Lower Supon, Barangay San Jose, matapos ini nga magbato sa mga otoridad.
Suno kay Kagawad Maguad, naaresto ang isa pa ka suspek nga si alyas “Denver”, residente sang Purok New Society, Barangay Esperanza, samtang padayon nga ginapangita ang nakapalagyo nga si alyas “Rico”, nga residente man sang siyudad.
Samtang, narekober gikan sa lugar ang anum ka heat-sealed plastic sachet sang ginapatihan nga shabu nga nagakantidad sang P102,000, duha ka improvised all-weather glass tooter, isa ka .45 caliber Colt pistol nga may mga bala, isa ka analog cellphone, kag isa ka granada.
Natalana naman nga pasakaan sang kaso nga Section 5, 6, 7, 11, kag 12, Article II sang Republic Act 9165 ukon ang Comprehensive Dangerous Drugs Act of 2002 ang mga suspek.
Nagapanawan naman ang opisyal sa tanan nga untatan na ang pagbaligya kag paggamit sang illegal nga droga agud nga makapangabuhi sang matawhay.
