KORONADAL CITY – Indi pa sigurado ang pagpungko bilang barangay chairman elect sang Barangay Sta. Cruz, Koronadal City ang nagdaug nga si Julius Bignayan lima ka adlaw matapos ang Barangay kag Sangguniang Kabataan election.
Ini matapos nga nagpaguwa sang suspension order ang Commission on Election (COMELEC) Second Division sa proclamation sini.
Madumduman nga sang tuig 2015 sang gindismiss si Bignayan sang Ombudsman-Mindanao matapos napamatud-an nga guilty sa kaso nga falsification of public documents.
May kaangtanan ini sa pag-palsipika ni Bignayan sa minutes sang Barangay Development Council (BDC) meeting sang Abril 2014.
Kaupod ni Bignayan nga ginkakas sadto amo ang Barangay Secretary nga si Juvie Bocol matapos napamatud-an nga guilty sa mga kaso nga grave misconduct, serious dishonesty kag conduct prejudicial to the best interest of the service.
Sa subong, ginahulat na lamang ang panibag-o nga kamanduan gikan sa Comelec kun sin-o ang iproklamar nga brgy. kapitan sa nasambit nga barangay.
