KORONADAL CITY – Dead on the spot ang isa ka katapu sang Barangay Peacekeeping Action Team (BPATs) samtang pilason naman ang 2 pa ka mga kaupod sini matapos ma-hit and run sang isa ka fish car samtang nagaronda sa national highway sakop sang Barangay La Esperanza sa banwa sang Tulunan ,North Cotabato.
Ini ang ginpahayag ni Barangay Kapitan Erwin Angulo sa ekslusibo nga interbyu sang Bombo Radyo Koronadal.
Suno kay Kapitan Angulo, nagapatigayon sang ronda sa lugar nga ginluntaran sang insidente ang grupo ni Bobby Patiam Gonzales kag duha pa ka mga kaupod sini sakay sang isa ka top-down nga ginagamit sang mga BPATs sa ila nga barangay para sa pagpatrolya sa Crossing 125, La Esperanza, Tulunan sang gin-arado sang isa ka unit sang bonggo truck ang top down nga ginasakyan sang mga ini kun diin nagtabog ang mga biktima.
Dead on the spot si Gonzales bangud sa tuman nga pilas nga naangkon sini ilabi na sa bahin sang iya nga ulo samtang ginadala naman ang duha pa ka kaupdanan sini sa pinkamalapit nga hospital.
Gilayon naman nga nagpalagyo ang Bonggo truck sa ginluntaran sang insidente padulong sa wala mahibaluan nga direksyon.
Nakuhaan man sang CCTV malapit sa ginluntaran sang insidente ang Bonggo truck nga ginalantaw makabulig agud matumod ang driver nga nag-hit-and-run sa mga biktima.
