Gina-awhag man subong ang mga Pilipino sa guwa sang pungsod nga magbulig para matag-an ang pugante nga si anay Ako Bicol Party List Representative Zaldy Co.
Ini matapos hambalon ni Department of the Interior and Local Government (DILG) Secretary Jonvic Remulla nga ginasiling nga nagatago sa Portugal ang anay mambabatas kag posible nga nagagamit sang Portuguese passport nga dugay na niya kuno nakuha kag ginagamit subong para makabiyahe sa Europa.
Wala pa man makumpirmar sang kalihim kon regular nga Portuguese passport ang ginagamit ni Co ukon kon nag-avail siya sang golden visa program sa Portugal, nga nagahatag sang lima ka tuig nga residency permit sa mga indi EU citizens kapalit sang investment nga nagaabot 500,000 euros ukon P34 milyon.
Ginpasa man sang kalihim sa Department of Foreign Affairs ang paghatag sang impormasyon may kaangtanan sa ginreport nga golden visa nga ginapanag-iyahan kuno ni Co.
