Ginpasa na sa plenaryo sang Kamara sa ikaduha nga pagbasa ang panukalang balaud nga nagatuyo magpalapad sang access sa libre nga tertiary education paagi sa pagpabakod sang Tertiary Education Subsidy (TES) kag paghatag sang voucher program para sa mga kwalipikado nga benepisyaryo sang Pantawid Pamilyang Pilipino Program (4Ps) nga luyag mag-eskuyla sa pribado nga kolehiyo ukon technical-vocational institutions.
Suno kay House Majority Leader kag Ilocos Norte Rep. Ferdinand Alexander “Sandro” Marcos, ang tuyo sang panukala amo ang pagbulig sa mga pigado pero may kapasidad nga mag-eskuyla agud makapadayon sa kolehiyo bisan limitado ang ila gastusan.
Ang panukala, nga House Bill No. 8476, kabahin sang Common Legislative Agenda sang Legislative-Executive Development Advisory Council (LEDAC). Tuyo sini nga i-reporma ang TES program kag maghatag sang voucher system para sa mga estudyante nga pigado pero kwalipikado nga makasulod sa pribado nga eskwelahan.
Ginpahayag man ni Tingog Party-list Rep. Jude Acidre nga awtomatiko nga isasakop sa TES ang mga estudyante nga nagikan sa pamilyang sakop sang 4Ps kon makapasar sila sa admission sang mga kolehiyong ginakilala sang (CHED).
Sa idalum sang panukala, magapadayon ang subsidy tubtob matapos sang estudyante ang iya kurso basta natuman ang academic kag residency requirements.
