KORONADAL CITY- Nagpasalamat si South Cotabato Govenor Daisy Avance-Fuentes sa mga katapo sang Armed Forces of the Philippines sa Marawi City nga nagbulig agud marescue si Father Teresito “Chito Suganob makaligad makapalagyo sa kamot sang Maute-ISIS sa Marawi.
Sa interbyu sang Bombo Radyo Koronadal sa gobernadora, isa ka maayo nga balita ilabi na sa mga South Cotabateños nga buhi sa gihapon kag tigayon na nga nahilway ang nasambit nga paro nga naghalin sa probinsya partikular na sa banwa sang Norala South Cotabato bag-o nangin Vicar General sang syudad sang Marawi.
Dugang pa sang gobernadora nga isa lang suno pa ini ka patimaan nga nagahilapit na nga magtakop ang gyera sa nasambit nga lugar kun sa diin nanawagan man ini sa mga terorista nga nagsungka agud indi na maglapnag pa ang dugo sa Islamic City.
Kaangot sini, nagpalab-ot man ini sang pagpangasubo ilabi na sa mga katapo sang AFP nga naghalin sa South Cotabato nga napatay sa tunga sang gyera.
Madumduman nga ang Marawi Crisis ang nag-ibwal sang nakaligad nga Mayo 23, 2017 nga gindunganan pa sang pagdeklarar sang Martial Law sa bug-os nga isla sang Mindanao kag tubtob sa subong nagapadayon pa ang kinagamo.
