KORONADAL CITY – Nagahingyo ang pamunuan sang Moro Islamic Liberation Front (MILF) sa Bangsamoro Islamic Freedom Fighters (BIFF) nga mag-upod sa ila agud nga ipakigbato ang pag-angkon sang gobyerno para sa bangsamoro nga maayo, plastado kag may pagbag-o matapos nga malusot ang BBL sa pinal nga pagbasa sang Kamara kag Senado kagab-i.
Ginpahayag sa Bombo Radyo Koronadal ni MILF Vice Chairman for Political Affairs Ghadzali Jaafar nga indi lain sa ila ang BIFF bangud ginakabig nila nga mga utod kag indi kaaway kag ang BBL lamang suno pa ang sabat sa problema sa Mindanao.
Suno pa kay Jaafar nagseparar lamang suno pa ang BIFF sa ila nga grupo sang wala ginsunod sang pamunuan sang MILF ang luyag nila nga lapason ang nahisgutan sa peace agreement sa gobyerno.
Kadungan sini, gin-awhag ni Jaafar ang BIFF nga maghulat, mag-antos kag magsakripisyo para sa tanan bangud ang handum sang BBL ang para sa tanan nga bangsamoro.
Apang, matig-a ang BIFF sa panawagan nga ini sang MILF.
Suno kay BIFF spokesperson Abu Misri Mama, indi sila magpamati kay Jaafar bangud wala sila nagapati nga ang BBL ang sabat sa madugay na nga problema sa Mindanao.
Samtang, nagpalab-ot naman sang pagpasalamat si Jaafar sa kongreso, senado, tanan nga sektor nga nagasuporta sa BBL labi na kay Pangulong Rodrigo Duterte.
