KORONADAL CITY– Ginpaidalum na sa imbestigasyon ang duha ka pulis nga nagduwelo kahapon sa Crossing Dagok, National Highway, Polomolok, South Cotabato nga sanday PO2 Ernie Sagabay kag PO3 Earl Malayo.
Sa interbyu sang Bombo Radyo Koronadal kay P/Sr. Supt. Franklin Alvero, Provincial Director sang South Cotabato nga gilayon gin dis-armahan ang duha ka pulis matapos ang insidente.
Dugang pa ni Alvero nga posible nga magapangatubang sang kaso ang duha.
Kaangot sini, ginpahayag ni Supt. Alvero nga isa ka lugar lamang naka istar ang duha ka pulis sa Barangay Silway 8, Polomolok kag nagapati ini nga may yara sila sang personal nga problema.
Samtang ginkumpirmar ni Supt. Alvero nga anay na nga na assign si PO2 Sagabay sa Polomolok Municipal Police Station apang gin rekomendar nga ibalhin sa Regional Public Safety Batallion okun RPSB 12 matapos nga nagpositibo ini sa surprise drug testing sang nagligad nga tuig.
Sa subong nagapabilin sa balay bululngan si PO2 Sagabay matapos makaangkon sang igo sang bala.
