Ginpahibalo sang Atin Ito Coalition nga pagahiwaton nila ang ika-apat nga civilian mission sa West Philippine Sea sa Abril.
Sa sini nga okasyon, ang civilian mission pagahiwaton paadto sa Pag-asa Island sa Munisipyo sang Kalayaan, nga bag-o lang ginpabugal sang madamo nga diskusyon matapos ang kontrobersyal nga pahayag ni Senador Rodante Marcoleta nga isuko na lang ang Kalayaan Island Group (KIG) bangod, suno sa iya, yara ini sa guwa sang exclusive economic zone (EEZ) sang Pilipinas.
Sa isa ka pulong-balita subong Huwebes, Marso 12, ginpahayag ni Atin Ito co-convenor Rafaela David nga ang nasambit nga misyon isa ka sabat sa tatlo ka daku nga krisis nga ginatubang sang pungsod subong, lakip na ang pagsaka sang presyo sang mga produktong petrolyo nga grabe nakaapekto sa kabuhi sang mga mangingisda, ang isyu sang pageespya sang China, kag ang paglapas sang ginatawag nila nga “Tsinador” sa WPS.
Sa sini nga civilian mission, target man sang koalisyon nga maghatag sang fuel kag food assistance sa mga gamay nga komunidad sang mangingisda nga nagaantos sang mataas nga presyo sang langis.
Ginplano nga ang bug-os nga civilian mission magalawig sang lima ka adlaw kag magapabilin sa Pag-asa Island sang isa ka adlaw.
Kaupod sini, nagpanawagan ang Atin Ito Coalition co-convenor sa gobyerno, business sector, kag publiko nga magpakig-upod sa mga Pilipinong mangingisda paagi sa paghatag sang fuel subsidies kag iban pa nga suporta agud mapadayon ang ila pangabuhi sa tunga sang krisis.
Ginpabugal man ni Atin Ito co-convenor Edicio Dela Torre nga isa sa pinakaepektibo nga paagi para matubang ang militarisasyon sang China sa WPS amo ang presensya sang ordinaryo nga Pilipino kag ang pagpatigayon sang mga civilian missions.
Bilang preparasyon sa ika-apat nga civilian mission, magahiwat sang pulong sa Marso 23 sa Puerto Princesa, nga ginapaabot nga dadaluhan sang WPS bloc sang Kamara kag Senado, mga opisyal sang lokal nga pamahalaan, church leaders, mga representante sang mga mangingisda, grupo sang kabataan, kag civil society organizations.
