KORONADAL CITY– Pagapangunahan mismo ni Father Teresito “Chito” Suganob ang ipatigayon nga Thanksgiving mass para sa iya sa tion nga makabalik na ini sa Brgy. Poblacion sa banwa sang Norala, South Cotabato.
Sa ekslusibo nga interbyu sang Bombo Radyo Koronadal kay Raqueto “Boyet” Suganob, otod ni Father Chito, mismo nga ang iya otod ang luyag nila nga magpanguna sa Thanksgiving mass nga ipatigayon sa ila puluy an.
Kaangot sini, tubtub subong indi sa gihapon makapati kag nagapasalamat sa pagbubu sang pangamuyo nga ginhalad para sa kaluwasan ni Father Chito.
Samtang nagapasalamat man ini sa Bombo Radyo Koronadal matapos una nila nga mabatian kahapon ang impormasyon nga luwas na ang iya nga otod.
Sa subong masako na ang pamilya sa pagpreparar para sa welcome party kay Father Chito kun sa diin talulupangdon ang nakasulat nga welcome tito pads sa ila puluy an.
