KORONADAL CITY- Nagapagkit na naman ang panibag-o nga kaso sang pagpangluhos sa isa ka menor de edad sa probinsya sang South Cotabato.
Nahibaluan nga ang biktima ang isa ka 8 anyos nga Grade 1 pupil halin sa Brgy. Liberty, Norala South Cotabato.
Sa interbyu sang Bombo Radyo Koronadal kay PCI Maricel Maganto, hepe sang Norala PNP, nagluntad ang insidente samtang papauli ang biktima halin sa buluthuan sang gintawag ini sang suspek nga si Orvil Poleon “Bobong” Fellera, 40 anyos, single kag residente sang nasambit nga lugar kag ginpasulod sa iya puluy-an.
Makaligad nga ma-engganyo ang bata sa iya puluy-an dire na sini ginhimo ang pagpanglugos sa biktima.
Samtang nagpanugid naman ang biktima sa iya amay rason nga ginreport gilayon sa Norala Municipal Police Station kun sa diin naarestar ang suspek.
Sa karun ginpasakaan na sang kaso nga paglapas sa R A 8353 o Anti-Rape Law ang suspek kag yara na sa kustodiya sang Norala PNP.
Nahibaluan nga ginakaalarma na sa probinsya ang asud-asod nga pagpanglugos sa mga menor de edad kun sa diin pinakabag-o nga insidente amuh ang pagpanglugos sa 5 anyos nga bata nga babaye sa Tampakan South Cotabato kag sang tinalikdan man nga binulan ang 9 anyos nga bata nga babaye sa T’boli South Cotabato nga brutal nga ginpangpatay.
