Nagapadayon ang imbestigasyon sang Tantangan MPS angut sa nasapwan nga patay nga lawas sang lalaki sa concrete main canal sa kilid sang National Highway, Brgy. Población, Tantangan, South Cotabato. Kahapon nga adlaw sang Lunes, Disyembre 1,2025.
Ginkilala ang biktima sa kay alyas “Juan”, 50-anyos nga lalaki, wala pa kasado, wala trabaho, kag residente sang Brgy. Poblacion, Tantangan, South Cotabato..
Sandig sa imbestigasyon antes sang insidente, ang biktima nag-inom upod sa iya mga paryente sang aga kag hapon sang tinalikdan nga adlaw sa Brgy. Poblacion, Tantangan, South Cotabato. Ang biktima ginbilin nga nagaisahanon kag hubog pa sa pagpauli sa iya balay. Sunod sini, mga alas 5:30 sang aga sang Disyembre 1, 2025, ang isa ka tawo nga may alias nga “Manong”, upod ang iya asawa, nagalakat sa kilid sang National Highway sang amo nga Munisipyo sang nakit-an nila ang lalaki nga nagahigda paubos sa pavement sang concrete canal kag dayon nila ini ginreport sa estasyon.
Wala naman may makita nga foul play ang mga awtoridad ukon iban pa nga indikasyon nga nakita sa lugar. Ang patay nga lawas gindala sang iya pamilya sa Diamond Funeral Home, Koronadal City, para sa post-mortem examination nga pagahimoon ni Dr. Renato Ureta, Municipal Health Officer.
