KORONADAL CITY – Patay ang tatlo ka tawo sa ginpatigayon nga anti-drug operation sang mga otoridad sa bahin sang Brgy. New Pangasinan, Koronadal City kaina alas 2 sang kaagahon.
Dala sang gintingob nga pwersa sang Regional Police Drug Enforcement Unit (RPDEU) 12, Regional Mobile Force Battalion (RMFB) 12, Koronadal PNP, South Cotabato PNP sa pakig-angot sang PDEA-12 ang walo ka search warrants sa kaso nga pagbayolar sa RA 9165 at RA 10591.
Batay sa inisyal nga imbestigasyon, patay ang mga suspek nga ginkilala sanday Jaime Sunga nga isa ka anay kagawad kag Reynaldo Navarro alyas Oga nga lunsay mga residente sang nasabing barangay; kag si Erwin John Magbanua, isa ka radio technologist sa isa ka pribado nga balay bulolngan nga residente naman sang Megaland Subdivision.
Na cleared naman Erwin Cabrido sa nasambit nga operasyon makaligad wala sang may narekober sa iya posisyon.
Pirmado ni Hon. Judge Oscar Noel Jr sang RTC-12 Branch 35 sadtong Hunyo 13 ang nasambit nga mga warrant.
Nagtalangison naman nga ginsalaysay sa Bombo Radyo Koronadal sang asawa sang drug suspect ang nangyaring drug operation sa bahin sang Megaland Subdivision sa Brgy. Carpenter Hill, siyudad sang Koronadal.
Suno kay Sarah Jane Magbanua, asawa ni Erwin John Magbanua, matulog na kuntani sila sang may nabatian sila nga kagahod sa guwa kag hinali na lamang sila nga ginsulod sang mga pulis.
Ginhambalan sila nga magduko bangud basi maigo sila, butang nga ila ginkatingala.
DIri na sila nakabati sang tatlo ka lupok nga patimaan na suno pa nga napatay sang mga otoridad ang iya mister.
